ప్రతీ మనిషినీ దైవస్వరూపంగా భావిస్తే అప్పుడు అవతలి వ్యక్తిని మోసం చెయ్యబుద్ధవదు,మాటలతో హింసించాలని ఉండదు.మనకి విశ్వజనీయ ప్రేమ తత్వం అలవడుతుంది...

Kks Kiran అన్నమయ్య సంకీర్తనలకి విశ్లేషణలు రాసేంత గొప్ప వాడిని కాను నేను,,కానీ గరిమెళ్ళ బాలక్రిష్ణ ప్రసాద్ గారు పాడిన " ఇతని కంటే మరి దైవము కానము యెక్కడ వెదకిన " అనే అన్నమాచార్యుని కీర్తన విన్నప్పుదల్లా దీని గురించి రాయాలి అని అనిపిస్తూ ఉంటుంది. ఈ కీర్తన చదవండి...!!! " ఇతని కంటే మరి దైవము కానము యెక్కడ వెదకిన నితడే అతిశయమగు మహిమలతో వెలసెను అన్నిటికాధారముతానె|| మదిజలధులనొకదైవము వెదకిన మత్య్సావతారంబితడుయ్ అదివోపాతాళమందు వెదకితే ఆదికుర్మమీ విష్ణుడు పొదిగొని యడవుల వెదకి చూచితే భూవరాహమనికంటిమి చెదఱక కొండల గుహలవెదకితే శ్రీనరసింహుబున్నాడు|| తెలిసి భూనభోంతరమున వెదకిన త్రివిక్రమాకృతి నిలిచినది బలువీరులలో వెదకిచూచితే పరశురాముడొకడైనాడు. తలపున శివుడును పార్వతి వెదకిన తారకబ్రహ్మమురాఘవుడు కెలకుల నావులమందల వెదకిన కృష్ణుడు రాముడునైనారు.|| పొంచి అసురకాంతలతో వెదకిన బుద్ధావతారంబైనాడు మించిన కాలము కడపట వెదకిన మిదటి కల్క్యావతారము అంచెల జీవులలోపల వెదకిన అంతర్యామై మెరసెను యెంచుక ఇహమున పరమున వెదకిన యీతడే శ్రీ వేంకట విభుడు|| " అన్నమయ్యకి ఎక్కడ వెతికినా " హరే సర్వవ్యాపకుడు " అని అనిపిస్తోందట.ఎక్కడ వెతుకుతున్నా అతని రూపమే గోచరిస్తోంది అని చాలా చక్కగా దశావతారాలను ఉదహరించి రాశాడు ఈ కీర్తనని... కాసేపు ఈ భక్తి భావాన్ని పక్కన పెడితే ఈ కీర్తన మళ్ళీ చదవండి. " లోకంలో ఎంతో విభిన్నంగా కనిపించే ప్రతీదానిలోనూ ఏకత్వాన్ని దర్శించమని చెప్పట్లేదూ అన్నమయ్య? జగత్తులో నిండి ఉన్నది అంతా ఒకటే,ఒకే చైతన్యం దీనినంతా నడిపిస్తోంది అనే భావన కలగచేసేలా ఉంది ఈ పాట. " " హరి సర్వాత్మకుడు ఆదిమ పురుషుడు హరి సర్వాత్మకుడు ఆదిమ పురుషుడు పొరి నెరుగు వారి పుణ్యముగాన " అనే కీర్తనలో అన్నమయ్య ఇలా అంటాడు. " నేలయు మిన్నును నిజ వెకుంఠము పోలించి చూడని పురుషుల వెలితి. మనసులోననే మాధవుడున్నాడు కనుగొనని వారి కడమింతే తనువే విష్ణుని తత్వసాధనము వొనరగ శ్రీపతి యున్నాడు గాన " అని అంటాడు. మన శరీరం విష్ణువు యొక్క తత్వం తెలుసుకునే ఓ సాధనం అట. ఇంతకీ ఏమిటా విష్ణువు తత్వం? అంటే ఇదిగో అన్నమయ్య చెప్పాడుగా ఇలా ప్రపంచంలో ప్రతీ వస్తువుని,సంఘటనీ సమదృష్టితో చూడమని. ఎంత అందంగా కనిపిస్తుందో ఈ జగత్తు అంతా ఇటువంటి భావనలు మనం కలిగిఉంటే??? ప్రతీ మనిషినీ దైవస్వరూపంగా భావిస్తే అప్పుడు  అవతలి వ్యక్తిని మోసం చెయ్యబుద్ధవదు,మాటలతో హింసించాలని ఉండదు.మనకి విశ్వజనీయ ప్రేమ తత్వం అలవడుతుంది... అసలీలోకమే గొప్ప ఆనందంతో నిండి ఉన్నట్లు కనిపిస్తుంది... ఆ తత్వాన్నే సాధన చెయ్యాలని అంటున్నాడు అన్నమయ్య....