పూర్వమువారు చేసినట్లు నిష్కామకర్మ చేయుము

Vvs Sarma

భగవద్గీత
106
ఏవం జ్ఞాత్వా కృతం కర్మ పూర్వైరపి ముముక్షుభిః|
కురు కర్మైవ తస్మాత్త్వం పూర్వైః పూర్వతరం కృతమ్|| 4-15 ||
తాను వాస్తవముగా కర్తకాదు. తనకు కర్మల ఫలములందపేక్షయుండరాదు. --- ఈ విధముగా తెలుసుకొనిన పూర్వమువారైన అనేక ముముక్షువులు నిష్కామ కర్మ ఆచరించి యుండిరి. కావున ఓ అర్జునా! నీవునూ వారివలే పూర్వమువారు చేసినట్లు నిష్కామకర్మ చేయుము.
మదర్పిత బుద్ధితో కర్మచేయుటవలన ఆ కర్మ నీకు అంటదు. కర్త, కర్మ, కర్మఫలము అన్నీ భగవంతునివే అనేదృస్టితో చేసిన కర్మ నిన్ను బాధించకుండా చేస్తాను.

కిం కర్మ కిమకర్మేతి కవయోऽప్యత్ర మోహితాః|
తత్తే కర్మ ప్రవక్ష్యామి యజ్జ్ఞాత్వా మోక్ష్యసేऽశుభాత్|| 4-16 ||
కర్మ ఏది? అకర్మయేది? ఈరహస్యమును సరిగా తెలియలేకున్నారు. దేనిని ఎరిగినచో నీవు సంసార బంధమునుండి విముక్తి పొందగలవో, అట్టి కర్మరహస్యమును నీకిప్పుడు చెప్పబోవు తున్నాను.
ఇంతకంటె తేలిక వాక్యములు మన ఆధ్యాత్మిక సాహిత్యంలో ఎక్కడా దొరకవు. ఇది భగవంతుని ప్రత్యక్ష బోధ. ఇది భగవంతుని వాక్కునుండి సకల వేదశాస్త్రముల సంగ్రహ రూపముగా వచ్చినది. ఒక కర్మ చేయవచ్చునా? చేయకూడదా? చేయకుండ ఉండవచ్చునా? వీటికి ఫలములు ఏమిటి? ఏలా చేస్తే ఇది బంధహేతువు అవుతుంది? ఆ పరిస్థితులలో నీ ధర్మం ఏమిటి? తరువాత శ్లోకాలలో వివరంగా చెబుతాడు