పాపులను రక్షించుటకు క్రీస్తుయేసు లోకమునకు వచ్చెను

Vvs Sarma భగవద్గీత 123 యథైధాంసి సమిద్ధోऽగ్నిర్భస్మసాత్కురుతేऽర్జున| జ్ఞానాగ్నిః సర్వకర్మాణి భస్మసాత్కురుతే తథా|| 4-37 || అర్జునా! హోమకుండములో చక్కగా ప్రజ్వలించిన అగ్ని సమిధలను అగ్నిలో వేసిన వెంటనే ఎట్లు కాల్చి భస్మము చేయునో, అలాగే జ్ఞానాగ్ని సమస్త కర్మలను (వాటిఫలములను) దగ్ధముచేయుచున్నది. ఇది కొంత పరామర్శ అవసరమైన భగవంతుని వాక్యము. మన దృష్టిలో పాపమునకు పాప ఫలము, పుణ్యములకు పుణ్యఫలము వేరు వేరుగా వస్తాయి. పుణ్య కర్మలు చేసి పాపములను ప్రక్షాళన చేసుకోలేము. ఉదాహరణకు పుణ్యముల వలన ఒక ధనవంతుని ఇంటిలో పుట్టి, సంచిత పాపకర్మ వలన దీర్ఘరోగి అవవచ్చును. కాని పాప ప్రక్షాళనమనే కోరిక అంతర్గతంగా ఉంటుంది. సంధ్యావందనములోని ఈ ప్రార్థన అటువంటిదే. యదహ్నాత్ కురుతే పాపం తదహ్నాత్ ప్రతిముచ్యతే యద్రాత్ర్య కురుతే పాపం తద్రాత్ర్యా ప్రతిముచ్యతే ఇతర మతములలో కూడా పాపప్రక్షాళన సంబంధించిన విషయాలు కనుపిస్తాయి. "పాపులను రక్షించుటకు క్రీస్తుయేసు లోకమునకు వచ్చెను" (1 తిమోతి 1:15). ఈ వాక్యం అనేక చర్చి గోడలపై చదివాను. మతం మార్చుకుని ఏసునినమ్మితే పాప ప్రక్షాళన జరుగుతుందా? పాపులకు రక్షణ అంటే ఏమిటి? అంతిమ తీర్పు దాకా పాపిని సమాధిలో శాంతితో విశ్రాంతి తీసుకోనుటకు (rest in peace) బెయిలు మంజూరుచేయడమా? ఇప్పుడు కర్మలను గురించి కొంచేం చూదాము. సంచితము, ప్రారబ్ధము, ఆగామి అని కర్మ మూడు విధాలు. అనేక పూర్వజన్మలలో చేసిన కర్మ పునర్జన్మకు హేతువవుతున్నది. ఇది జీవికి గల సంచితకర్మ. సంచీనిండా ఉందనుకుందాము. ఇది తీర్చడానికి ఒక జన్మలో కాలం సరిపోదు. మనుష్యుడు భరింపజాలడుకూడా. దైవ నిర్ణయంగా ఈ జన్మలో భరింపగలిగిన ఒకభాగాన్ని మాత్రం తీసుకొని ప్రస్తుత దేహంలోనికి వస్తాడు. ఇది ఈ జన్మలో తనకు లభించిన ప్రారబ్ధ కర్మ. ప్రారబ్ధ కర్మను అనుభవిస్తూ మళ్ళీ కొంత కర్మను మూటగట్టుకుంటాడు. ఇది ఆగామి కర్మ. అంటే ప్రతిజన్మలో కొంత కర్మ క్షయం, కొంత సంచితానికి తిరిగి జమ అవుతుంది. ఏదో భవిష్యత్తు జన్మలో అనుభవానికి వస్తుంది. ఇక జ్ఞానం విషయం రేపుచూదాం.