హైదరాబాద్‌, జూలై 31 (ఆంధ్రజ్యోతి): తెలంగాణలో గుడుంబాను సమూలంగా నిర్మూలించే విధంగా నూతన ఆబ్కారీ విధానాన్ని ఖరారు చేయాలని అధికారులను ముఖ్యమంత్రి కె. చంద్రశేఖర్‌రావు ఆదేశించారు. అక్టోబర్‌ నుంచి నూతన ఆబ్కారీ విధానం రాష్ట్రవ్యాప్తంగా అమల్లోకి రానుంది. అయితే, ఈ విధానం అత్యంత ఆచరణాత్మకంగా, వాస్తవ పరిస్థితులకు అనుగుణంగా, అక్రమాలకు తావు లేకుండా ఉండాలని సీఎం నిర్దేశించారు. ముఖ్యంగా, ఆదాయంపై కాకుండా ప్రజలకు హాని తలపెట్టని విధంగా నూతన విధానాన్ని గట్టిగా అమలు చేయాలన్నారు. ‘‘కాయకష్టం చేసిన ప్రజలు సేద తీరడం కోసం కొంత మద్యం తీసుకొంటారు. అలాంటివారి ఆరోగ్యానికి, ప్రాణానికి హాని తలపెట్టని రీతిలో మద్యాన్ని అందించాల్సి ఉంది. దానికి అవసరమైన విధానాన్ని రూపొందించాలి’’అని సూచించారు. శుక్రవారం సచివాలయంలో ఆబ్కారీ విధానం పై ఆయన సమీక్ష సమావేశం నిర్వహించారు. రాష్ట్రంలో సుమారు రూ. 28వేల కోట్లతో సంక్షేమ పథకాలు అమలు చేస్తున్నప్పటికీ సంక్షేమంగా ఉండాల్సిన ప్రజలు గుడుంబా బారినపడి మరణిస్తున్నారని ఆవేదన వ్యక్తం చేశారు. నూతన ఆబ్కారీ విధానం అమల్లో ఈ విషయాలను పరిగణనలోకి తీసుకోవాలని కోరారు. గుడుంబా కారణంగా ఇంటి యజమానులు మృత్యువాత పడడం వల్ల మహిళలు చిన్నతనంలోనే వితంతువులుగా మారుతున్నారని తెలిపారు. ఈ పరిస్థితుల్లో గుడుంబాను పూర్తిగా లేకుండా చేయడానికి అవసరమైన విధానాన్ని ఖరారు చేయాల్సి ఉన్నదన్నారు. దేశంలోని ఐదు మెట్రో నగరాల్లో హైదరాబాద్‌ ఒకటని, నూతన విధానం రూపకల్పనలో ఈ విషయాన్నీ జ్ఞప్తిలో ఉంచుకోవాలన్నారు.
సివిల్‌తో ఎక్సైజ్‌ సమన్వయం
గ్రామాల్లో అక్రమసారా తయారీతోపాటు పొరుగు రాష్ట్రాల నుంచి రవాణా అవుతున్న నాన్‌డ్యూటీ పెయిడ్‌ మద్యానికీ కళ్లెం వేయాలని ఆదేశించారు. ఇదంతా జరగాలంటే ఆబ్కారీ శాఖను బలోపేతం చేయాల్సి ఉన్నదని అభిప్రాయపడ్డారు. దానికోసం ‘‘ఎక్సైజ్‌ శాఖకు సివిల్‌ పోలీసుల సహకారం అందిస్తాం. దీనిపై త్వరలో పోలీసు అధికారులతో సమన్వయ సమావేశం ఏర్పాటు చేద్దాం’’ అని తెలిపారు. తెలంగాణలో ప్రజలకు మంచి కల్లుని అందుబాటులో ఉంచాలని సూచించారు. వచ్చే ఏడాది నాటికి అన్నిచెరువుల వద్ద సుమారు 5 కోట్ల ఈత మొక్కలు పెంచాలని, ఎక్సైజ్‌ శాఖ ఆధ్వర్యంలోనే నర్సరీలు ఏర్పాటుచేసుకోవాలని నిర్దేశించారు. సమర్థ పర్యవేక్షణ కోసం.. ఎక్సైజ్‌ శాఖకు ప్రత్యేకంగా ఇద్దరు డీఎ్‌ఫఓలను కేటాయించనున్నట్టు ప్రకటించారు. సమావేశంలో మంత్రి పద్మారావు, రెవెన్యూ ముఖ్యకార్యదర్శి అజయ్‌ మిశ్రా, చంద్రవదన్‌ పాల్గొన్నారు.
No comments:
Post a Comment