డబ్బుంటేనే డాక్టర్‌..
మీరు డాక్టర్‌ కావాలనుకుంటున్నారా ? గొప్ప వైద్యుడిగా పేరు తెచ్చుకోవాలని కలలుగంటున్నారా ? మీ కలలు నిజం కావాలంటే మీకు తెలివుంటేనే సరిపోదు. మీరు గొప్ప ధనవంతుడై ఉండాలి.సీటు కోసం కోట్లు ఖర్చు పెట్టే ఆర్ధిక పరిస్థితి ఉండాలి.ర్యాంకులో కాస్త తేడా వచ్చి...మేనేజ్‌మెంట్‌ కోటాకు వెళ్లారంటే మీ ఆస్తులు కరిగిపోవాల్సింది.బీ కేటగిరి సీట్ల పేరుతో కాలేజీ మేనేజ్‌మెంట్లు దోపిడి సాగిస్తున్నాయి.మెరిట్‌ ర్యాంకు వచ్చిన స్టూడెంట్లు అడ్డం పెట్టుకుని మరీ అక్రమాలను కొనసాగిస్తున్నాయి. మేనేజ్‌మెంట్‌ సీట్ల విషయంలో ఏపీ ఆరోగ్యశాఖ మంత్రి చేసిన కామెంట్స్‌...అక్రమాలు జరుగుతున్న విషయాన్ని చెప్పకనే చెప్పాయి.
సీట్లు భర్తీ చేయడంలో కాలేజీలు అక్రమాలకు పాల్పడుతున్నాయి.ఇష్టారీతిన వ్యవహరిస్తూ కాసులు వెనకేసుకుంటున్నాయి.సీట్లతో కోట్లు సంపాదించుకోడానికి ప్రత్యేకంగా సెట్‌ నిర్వహించి కౌన్సిలింగ్‌ చేసుకునే భాగ్యం మెడికల్ కాలేజీలకుంది.బీ కేటగిరీ సీట్లను అమ్ముకోడానికి కాలేజీలు చావు తెలివి తేటలు ఉపయోగిస్తున్నాయి.ముందు మంచి ర్యాంకు వచ్చిన పేద విద్యార్ధిని పట్టుకుంటాయి.ఆ విద్యార్ధి పేరుతో సీటును రిజర్వ్‌ చేస్తాయి.ఆ తరువాత అతనికి కొంత డబ్బు ముట్టజెప్పి ఆ సీటును లక్షలు,కోట్లకు అమ్ముకుంటున్నాయి.ఈ మధ్యకాలంలో ఇలాంటి సెకండ్‌ హ్యాండ్‌ సీట్ల వ్యవహారం బాగా ముదిరిపోయింది. అయితే గుట్టుగా వ్యవహారం చక్కబెడుతున్న మెడికల్ కాలేజీల బాగోతం బయటికి పొక్కింది. కాలేజీలు అక్రమాలకు పాల్పడితే కఠిన చర్యలు తీసుకుంటామని సాక్ష్యాత్తూ ఏపీ మంత్రి కామినేని చెప్పడం ఈ ఆరోపణలు నిజమేనని తేలుస్తున్నాయి..!
No comments:
Post a Comment