కలంతోన అద్భుతాలు చేసేస్తూ నెలరాజా భావాలను చిత్రించుట కవులకడనె నేర్వాలీ. ..

Rvss Srinivas 

|| నేర్వాలీ - తెలుగు గజల్ 97 ||

స్వఛ్ఛంగా నవ్వుట పసిపాపకడనె నేర్వాలీ
జీవితాన క్రమశిక్షణ చీమకడనె నేర్వాలీ

అనునయించు శ్రీకృష్ణుని శిరసు తన్నివేసింది
అలుకలోని పొగరు సత్యభామకడనె నేర్వాలీ

వాస్తవాల చేదుగుళిక మింగుతుంది మానసం
మధురమైన కలగనడం కనులకడనె నేర్వాలీ

విషాలెన్నొ కక్కినాయి వేనవేల విషాదాలు
ప్రేమజలధి మథనమ్ములు మనలకడనె నేర్వాలీ

కలువకళ్ళ వెలుగుకొట్టి తారలతో సయ్యాటలు
చోరవిద్య రహస్యాలు మామకడనె నేర్వాలీ

చెలినవ్వులు మల్లెలలో పాలు నీళ్ళలా కలిసెను
విడగొట్టే ప్రక్రియలను హంసకడనె నేర్వాలీ

రేయి పగలు అని చూడక కష్టించే దేవత
సహనశక్తి పాఠాలను అమ్మకడనె నేర్వాలీ

కలంతోన అద్భుతాలు చేసేస్తూ నెలరాజా
భావాలను చిత్రించుట కవులకడనె నేర్వాలీ. ...@శ్రీ