చూడగా చూడగా నాకూ అతగాడినో ఆట ఆడాలనిపించంది..
నన్నే ప్రేమిస్తున్నానంటున్న వాడి సంగతేంటో చూడాలనిపించింది..
.
పరిచయం పెంచుకుని, చిరుకవితలు, ప్రేమమాటలూ మొదలెట్టాను..
నాకేం కావాలన్నా అతన్నే అడగసాగాను..
అందరి ఎదుట మా పరిచయాన్ని అతిశయంగా ప్రదర్శించాను..
.
అడ్డదారిలో వెల్తున్నావని ఒకరిద్దరు తప్పుపట్టారు..
అతన్నసలు నమ్మవద్దని మరికొందరు హెచ్చరించారు..
అన్యాయమైపోతావన్న వారి భయాలకు నేను నవ్వుకున్నాను..
నా హద్దులు నాకు తెలుసంటూ కసురుకున్నాను..
.
అందాకా వచ్చినపుడు నేను చూసుకోగలనన్నాను.
ఎప్పుడు కావాలంటే అప్పుడే ఆ బంధాన్ని తెంచుకోగలనన్నాను..
.
కానీ అంతా తారుమారయింది.
నవ్వులాటగా నేను వేసిన ఒక్క అడుగుతో నా జీవితమే మారిపోయింది..
.
ఆడిద్దామనుకున్న నేనే ఆటబొమ్మనయ్యాను.
నాకే తెలియనంత వేగంగా అతని మోహంలో చిక్కుకున్నాను..
అతన్నే నమ్ముకుని, అన్ని బంధాలనూ వదులుకున్నాను..
ఆ తర్వాతే అతని నిజస్వరూపాన్ని తెలుసుకున్నాను..
.
ఆ స్థితికి చేరాక.. ఇక అతను నా లెక్కలన్నీ చక్కబెట్టాడు..
ఒక్కసారి నాదానవయ్యాక నువ్వింకెవరికీ దక్కవన్నాడు..
.
ఎన్నాళ్ళగానో దాచుకున్న ఆస్తులన్నీ దోచేశాడు..
ఇకపైన ఆర్జించే అవకాశాల్నీ కూల్చేశాడు..
చేతబట్టుకున్న సొమ్ముల్ని సైతం లాక్కున్నాడు..
నా దగ్గరుండడం తప్ప నువ్వింక చేయగలిగిందేమీ లేదన్నాడు..
.
అతన్ని వదలి బతికే వీలే లేకుండా నా దేహ భావాన్ని కాల్చేశాడు..
మరొకరిపై మరులనేవే కలగకుండా నా మనసునే మార్చేశాడు..
.
చివరగా నేను తెలుసుకున్నదేంటంటే,
నేను చేరవలసినచోటుకే చేరానని..!
.
మానస లోలుడే నా పతీ, గతీ..!!
No comments:
Post a Comment