భక్తి అనేది ఒక సాధనం. అది అందరికీ కుదిరేది కాదు. భగవంతుడు ఉన్నాడు, ఆయన శక్తి వున్నది అని చెప్పడానికి పెద్దగా లాజిక్ అవసరం లేదు. ఒక్కసారి మనం ఎక్కడనుండి వచ్చాము, ఈ విశ్వం ఎక్కడనుండి పుట్టింది, ఎందుకు ఇలా వుంది, ఎందుకు ఇలానే వుంది అన్నది ఒక్కసారి ఆలోచిస్తే తెలుస్తుంది, ఇదేదో మహాశక్తి చేసిన విశ్వరచన అని. ఆ మహాశక్తినే దైవం అని పేరు పెట్టుకున్నాం. ఆ శక్తి నిరాకారమైనది, అవసరమైనప్పుడు సాకారంగా కనబడుతుంది. స్త్రీ గా, పురుషునిగా మనకు గోచరిస్తుంది. ఆ శక్తి కి మనం ఒక పేరు పెట్టుకుంటున్నాం. శివుడు అని, విష్ణువు అని, మరొకటో అని. నామరూపగుణ రహితుడు, సహితుడు కూడా ఆయనే (ఆవిడే). ఇప్పుడు ఆ శక్తిని అనుభవించడం ఒక వరం

Kiran Mva

దైవదర్శనం – పోకేమాన్
ఇదేమిటో చాలా విడ్డూరంగా కనబడవచ్చు. నక్కకు నాగలోకానికి ముడి పెట్టాడేమిటి అని. కొంత సేపు శాంతంగా చదవమని ప్రార్ధన. పోకేమన్ గురించి తెలిసిన వారు ఈ క్రింద పేరా విడిచి మిగిలినది చదవవచ్చు.
నేటి యువతకు తప్పకుండా తెలిసిన , విన్న ఆట పోకేమాన్ గో. ఈ మధ్యనే ఒక రెండు వారాల క్రితం విడుదల అయ్యిన ఆట ఇది. ఇప్పటివరకు జనాలు క్యాండీ క్రష్ గురించి విన్నారు, ఆ రిక్వెస్ట్ బాధలు పడ్డారు. అదొక కంప్యూటర్ గేమ్. ఈ పోకేమోన్ ఆట వర్చ్యువల్ రియాలిటీ ఆధారంగా రూపొందించబడింది. సాటిలైట్ ఆధారంగా కొన్ని కొన్ని ప్రదేశాలలో ఒక రకం పోకేమోన్ జీవి వున్నట్టు భ్రమింపచేస్తారు. అది ఆ ఆట వారి సెల్ ఫోన్ లో install చేసుకున్న వారికి ఆ సిగ్నల్ వస్తుంది. వారు అప్పుడు వారి మొబైల్ తీసి దానిలో చూసి ఆ జీవిని బంధించాలి. ఆ జీవిని చేరుకునే మ్యాప్ చెబుతుంది. ఆ మ్యాప్ ఆధారంగా మనం నడిచి వెళ్లి ఆ జీవిని పట్టుకోవాలి. కొన్ని కొన్ని పార్కులు ప్రదేశాలలో వీటి సంఖ్య భారీగా వుంచడం వలన జనాలు అటువంటి ప్రదేశాలకు వెళ్లి మరీ ఈ వేటలో వున్నారు. కానీ ఈ గేమ్ లేని వారికి అవి కనబడవు. మన అందరికీ అటువంటి వాళ్ళు పిచ్చి వాళ్ళలాగ కనబడతారు. ఫోన్ లో చూసుకుంటూ ఏవో సైగలు చేస్తూ, దొరికితే యెగిరి గెంతులేస్తూ వింతగా ప్రవర్తించే వారిలా కనబడతారు. కానీ ఆడే వారికి అందరిలా అన్నీ వున్నా, వారికి ఒక ప్రత్యేక సోపానం ఉండడం వలన వారు ఈ ఆటను ఆస్వాదించగలుగుతున్నారు.
వీటిని చూస్తె ఒక్కసారి ఆధ్యాత్మిక ఆలోచన ఒకటి వచ్చింది.

భక్తి అనేది ఒక సాధనం. అది అందరికీ కుదిరేది కాదు. భగవంతుడు ఉన్నాడు, ఆయన శక్తి వున్నది అని చెప్పడానికి పెద్దగా లాజిక్ అవసరం లేదు. ఒక్కసారి మనం ఎక్కడనుండి వచ్చాము, ఈ విశ్వం ఎక్కడనుండి పుట్టింది, ఎందుకు ఇలా వుంది, ఎందుకు ఇలానే వుంది అన్నది ఒక్కసారి ఆలోచిస్తే తెలుస్తుంది, ఇదేదో మహాశక్తి చేసిన విశ్వరచన అని. ఆ మహాశక్తినే దైవం అని పేరు పెట్టుకున్నాం. ఆ శక్తి నిరాకారమైనది, అవసరమైనప్పుడు సాకారంగా కనబడుతుంది. స్త్రీ గా, పురుషునిగా మనకు గోచరిస్తుంది. ఆ శక్తి కి మనం ఒక పేరు పెట్టుకుంటున్నాం. శివుడు అని, విష్ణువు అని, మరొకటో అని. నామరూపగుణ రహితుడు, సహితుడు కూడా ఆయనే (ఆవిడే). ఇప్పుడు ఆ శక్తిని అనుభవించడం ఒక వరం. అది మన పూర్వజన్మ సుకృతం. పూర్తిగా భగవంతుని తెలుసుకున్న వారికి అన్నింటా దైవమె గోచరిస్తుంది. మనబోటి వారికి మన పూర్వపు ఋషులు, పెద్దలు చెప్పిన ప్రదేశాలలో దైవం వుందని నమ్మకం వుంది. అక్కడ మన మానస నేత్రాలకు కనబడక పోయినా అక్కడ దైవం వుందని నమ్మకం మనకు. ఒక గుడిలో ప్రతిష్టించిన విగ్రహంలో దైవాన్ని దర్శించుకుంటాం. ఎలాగంటే మనం చూడని రేడియో తరంగాలు అన్ని చోట్ల వున్నా కూడా కేవలం ఆంటిన్నా ఉన్న సెల్ ఫోన్ లోనో, లేక రేడియో లోనో మనం ఆ శక్తిని గ్రహించి మనకు అర్ధమయ్యే రీతిలో అనుభవించినట్లు.

మనకు దేవుడు పంచభూతాత్మకమైన శరీరం ఇచ్చాడు. ఐదు కర్మేంద్రియాలు, ఐదు జ్ఞానేంద్రియాలు ఇచ్చాడు. ఒక జ్ఞానేంద్రియం పని చెయ్యక పోతే ఆ జ్ఞానం మనకు కలుగదు. కనులు కనబడని వాడికి ప్రపంచమంతా ఎలా చీకటిలా వుంటుందో, ఒక చెవిటి వాణి శబ్దం అంటే ఎలా తెలియదో, భక్తి లేని వాడికి దైవం గురించి అవగాహన వుండదు. పుట్టుకతోటే పసిపాపకు పాలు తాగడం ఎలా తెలుస్తుందో అన్న విషయంలోనే దైవలీల కనబడుతుంది. పైన మనం చెప్పుకున్నట్లు సెల్ ఫోన్, దానిలో ఆ app ఉన్నవాడికి అక్కడక్కడ పోకేమోన్ లు ఎలా కనబడతాయో, శరీరం ఉన్నవాడికి, అందులో భక్తి ఉన్నవాడికి ఆయా ప్రదేశాలలో దైవం, దైవ శక్తి కనబడతాయి. అక్కడ మనం దైవాన్ని ప్రార్ధించుకుంటాం. ఇది అర్ధం కాని దౌర్భాగ్యులకు అదొక పిచ్చి లాగ కనబడుతుంది. దైవదర్శనం చెయ్యడం అనేది ఒక ప్రత్యేక జ్ఞానం. ఆ ప్రత్యేక ఆరవ జ్ఞానేన్ద్రియం లేని వారు నాస్తికులుగా, అదేదో విజ్ఞాన సంఘం వారిగా, ఒక రకం మేధావి వర్గం అని చెప్పుకుని తిరుగుతూ వుంటారు. అటువంటి వారికి ఆ జ్ఞానం లేదని మనం జాలి పడడం తప్ప వారికి ఎంత చెప్పినా అర్ధం కాదు. వాళ్ళను మనం “spiritually challenged” అని నామకరణం చేసి వదిలెయవచ్చు, అచ్చోసి ఆంబోతును వదిలేసినట్టు. మనకు ఆ దైవజ్ఞానం మరింతగా భాసించి అన్ని చోట్లా, సర్వకాల సర్వావస్థల యందు దైవదర్శనం చేసుకునే అనుగ్రహం ఆ దైవం ప్రసాదించాలని వేడుకుందాం.
ఒక పనికిమాలిన ఇనుము ముక్క మీద ఒక మాగ్నెట్ తో రుద్డగా రుద్దగా అది కూడా ఆయస్కాంతంగా మారినట్టు, భక్తితో మనం ప్రయత్నించగా, త్రికరణ శుద్ధిగా మన ఋషులు చెప్పిన మార్గంలో పయనించగా తప్పక మనకు కూడా దైవానుగ్రహం కలుగుతుంది. ఇది ప్రకృతి యొక్క నియమం. సత్యం సత్యం పూన: సత్యం

!! ఓం నమో వేంకటేశాయ !!
!! సర్వం శ్రీ వేంకటేశ్వరార్పణమస్తు !!