ప్రార్ధనతో కూడిన చైతన్య నాదం అందుకే మనలో ఉద్భవించాలి శంఖనాదం అదే కావాలి మన జీవన నినాదం

Ramakrishna Chowdary Jasti

సభాపర్వం

ప్రజల ప్రతినిధులు
ఇలా విషనాలుకలతోమాట్లాడతారనుకోలేదు
తన మృధువైన అధర రేఖలతో మాట్లాడవలసిన
రోజా పుష్పం ఇలా తన ముళ్ళతో జవాబు ఇస్తుందనుకోలేదు
శాసనసభ స్రవించే రక్తగేయం ఎవరికీ వినిపించడం లేదు
వాళ్ళని ఎన్నుకున్న ప్రజలకి ఎక్కడా భవిష్యత్తు కనిపించడం లేదు
దొంగలు పడ్డ దేశానికి చిల్లులు పడడం తప్ప
దేశానికి వచ్చిన మహా రోగానికి కనుచూపులో
ఎక్కడా పరిష్కారం కనిపించడం లేదు
కుంచించుకుపోతున్న దేశంలో రాజకీయవ్యాకోచం
దేశం నిండా నిండిపోయిన సగటు మనిషుల
గుండెలో సుదీర్ఘ గాయం
బ్రతికున్న శవంలా మరణం కోసం మన ఎదురుచూపు
ఈ ఉగాది అయినా మనలో జీవం నింపి
ఒక విప్లవసంఘంగా మార్చాలని మనలో కలగాలి
ప్రార్ధనతో కూడిన చైతన్య నాదం
అందుకే మనలో ఉద్భవించాలి శంఖనాదం
అదే కావాలి మన జీవన నినాదం
లేకుంటే మనకి ప్రతీ రోజూ మరణవేదమే
మనకి ప్రతీ రోజూ అంత్యక్రియల ప్రమాదమే...
బహుపరాక్!

జాస్తి రామకృష్ణ చౌదరి
21.3.2015